Wurdt it eins noch
makke?
Wurdt it noch
ferkocht?
En as dat sa is:
wêr is dat giele guod dat der útsjocht as moarnswetter fan ien dy’t wat ûnder
de leden hat dan noch te krijen? Ik bedoel dat spul, dat eltsenien weromtinken
docht oan in beppe, âldebeppe of muoike: in froutsje dat eartiids wenne yn in
lyts húske of keammerke yn in âldereintehûs. No ja, ‘dat eltsenien noch ken’...
ik haw it dan al oer minsken fan myn generaasje en de generaasjes dêrboppe,
fansels.
Ik ken it fan
beppe Gep dy’t persys op de helte wenne fan de kuierrûte fan de beukerskoalle
nei hûs. Nei skoaltiid strûsden wy healwei by beppe yn de hûs, foar in dropke
én in pipermuntsje. Se stienen yn twa glêzen potten, rjochts efteryn de fêste
keamerskast. De smaak fan dy twa, swart en wyt, tagelyk yn de mûle kin ik sa
werombringe op myn tonge, yn myn holle.
Beppe Gep wie
gjin ‘útgeanstipe’. Sy wie doe’t ik lyts wie dan ek al hiel âld... faaks dat se
immen âld west hat! Fuort gong se dus net echt, útsein it jierlikse
âldereins-busreiske, altemet gong se nei oare âlde froulju om tee te drinken
(tink ik, mar it kin ek in advokaatsje west hawwe) en somtiden op snein nei de
herfoarme tsjerke.
Soe se op dy
mominten it fleske giel rûkersguod derby krige hawwe?
Soe se op dy
mominten it dopke hoeden fan it flakontsje draaid hawwe?
Soe se dan in
bytsje fan dat aromatyske wetter op in fingerein smard hawwe en dan yn de
nekke? Bytsje efter in linkerear, bytsje efter de rjochter?
Of soe se der
royaal mei west hawwe?
Ik tink it net. Ik
likenet my earder, dat it flakontsje nei moannen en jierren noch healfol wie.
In dikke tritich
jier nei de lêste kear dat ik it opsnúfde, moast ik it nochris rûke. Op nei
Douglas foar de testflakon fan wat wy immen ‘ouwe klonje’ neamden. Ik wie al in
skoft net yn de winkel west... en it saneamde frouljusguod dat immen oan de
lofter kant stie by it deryn kommen, stie no rjochts! De winkelfamkes wienen
noch like kreas klaaid en opferve, en alle pakjes waarden prachtich fersierd
mei in soad linten, strikken en krollen. Net alles feroaret.
Of dochs?
Want wat in
nuvere gewaarwurding... Eau de Cologne 4711 is hielendal net giel!
Hat myn eigen ûnthâld
my foar it lapke hâlden? Dat moat eins wol.
Geen opmerkingen:
Een reactie posten